EN UN DÍA COMO HOY SOBRE LA IMPORTANCIA DE LA LENGUA MATERNA LES INVITAMOS A COMPARTIR Y REFLEXIONAR SOBRE EL RESPETO A LOS PUEBLOS INDÍGENAS, SU LIBRE DETERMINACIÓN Y AUTONOMÍA, PLASMADA EN LA CONSTITUCIÓN MEXICANA EN SU ARTÍCULO SEGUNDO, PERO TAN NEGADA COMO LOS MISMOS PUEBLOS Y SU DERECHO A EXISTIR.

Artiikulo 2. Ju Mejiko Nasion wepulei into kaa nanaiyotewa.
Ju nasion kaa nanau maachi yoemiata jippue, si’ime yoemem bwiapo
ju’unakteim yo’orakai, kee wame yoim im kom yajao naateka inim
jo’akkame, ian tajti batnaateka benasi emo uju’u, ania into bem yoolutu’uria
jooa, waka bem ukkule’u jijiokot juni a yuma’asaka, wawateka jumak kaa
yuma’isi a bo’ojooria ta jijiokot juni ketun a jooa.
Wa au inliijena ju’uneiyame into au inliijenalemtau naikiawa into tuu
ya’atune wa lutu’uria inliijenata betchi’ibo yejtekame.
Inliijena puepplota nau jooa, wa yoemia wepulsi nau lutu’uriaka ji’apsame,
bem aawepo luula emo aniakai, bem yoolutu’uria nau sualeka wepul
tebatpo nau joome, into bem ya’ura yo’ore waka bem yoolutu’uriata a
teuwa benasia.
Ju inliijena bem lutu’uria a witti tuu ya’ane kaita jinilekai, kaa kojtitusiontat
bepattukai into kaa juka Nasionta nanaiyotekai. Juka inliijenata lutu’uria
ta’atune betchi’ibo wam kojtutusionimpo bem joomem belekatana
ket a teuwane. Wame inliijenata lutu’uria kimaabaeme, ika artiikulota teuwamak lutu’uriane. Juka nokta into jaksa bem joomeu mammatteka
bem lutu’uria kima’ane.
A. Ini Kojtitusion inliijenata lutu’uria teuwa, a yecha into a tuu ya’ane kaita
jinilekai juka:
I. Jaisa bem nau emo uju’ubae’, bem ya’ura, jaisa bempo nau cha’atuka
emo aniane, poliitikapo, into yoolutu’uriapo.
II. Inliijena ya’urata a teuwapo luula aa a bo’ojooria, waka kaa nau
allewamta into nasontumta a tu’ute betchi’ibo, Kojtitusiontat jibwisiatekai,
nujmeam lutu’uriam yo’orekai into si’ime yoemiam lutu’uriam. Ta che’a
batnaatekai wame jaamuchim lutu’uriam nakekai into yo’orekai. Jum
lutu’uriapo ket aa teuwatune, jakwosa into jachin wame inliijena ya’uram
tu’ yechaka’ ket aa yo’oritune.
III. Ya’urata yeu pua betchi’ibo batnaateka jaisa ya’urata yeu puppua
benasia into bem lutu’uriapo luula am ju’unaktesakane, jaamuchim
nakeka kaa omola am biabiaktakai bem ya’urapo am kima’ane kechia,
peleral paktota yo’orekai into kaa Ejtaotat bepattukai.
IV. Kaa waka bem nokta, waka batnaateka bem ta’a’, waka si’imek bem
yoolutu’uriata into emo inliijenawamta tomtamta kaa lu’utine betchi’ibo,
ala a yo’oturiane.
V. Inliijena tosata jipu’une into bem bwiara yuma’isi jipu’une’ ika
kojtitusionta a teuwapo luula.
VI. Junuen eamta, wajoorita attea o a jipu’ betchi’ibo aa a bo’ojooria ika
kojtitusionta into wa lutu’uria inie betchi’ibo katekamta yo’orekai, into jiba
junaeni wame watem wajoorim lutu’uria yo’orekai, into juka juya aniapo
ayukamta tekipanoa betchi’ibo a joomepo wajiwa ju’unakteimta. Ta kaa
waka tebatta jaibu yeu puataka nakwamta, ika Kojtitusionta a teuwapo
luula. Inika yuma betchi’ibo tu’isi nau cha’atune ju inliijena yoi luturiapo
a weye benasia.
VII. Senuk bem yeu puane’, jum Munisipiompo inliijenata joomepo,
senuk ame betchi’ibo kiktenemta ayuntamientowi. Jume Kojtitusionim
into lutu’uriam entilat peleratibampo inika lutu’uriata ta’ane, a kima’ane
into a bo’ojooriane jum Munisipiompo, inie weenekai waka inliijenata lutu’uriane into a utte’ane betchi’ibo, ta beja yee yeu puppuawapo luula
yeu puatune.
VIII. Ejtaota juriliksiontamak eenekai. Junak beja ini lutu’uria tu’u
ya’atune si’imekuchi yoimmeu bichaa ya’ura bitwa’apo, aapola o bu’uka
nawi, bwe wa bem yoolutu’uria ket bitna into mammattena ta jiba yuu ika
Kojtitusionta teuwa’u nakekai. Ju inliijena jiba waka a jinne’unemta aa
a’awa a yoolutu’uriawa into a nokiwa ta’amta.
Jume Kojtitusionim into wame luturiam entilat peleratibam betana
to’okame a yecha’ane, jaisa waka kaitat into kaabetat bo’obichaka bem
ukkule’ yumane puepplo inliijenam betchi’ibo jum wewepul Ejtaompo
belle’ekatana, into jiba junen waka lutu’uriata tomtane inliijenam joome
bellekatana, bempo jum etilatpo interej pupplikotune.
B. Ju Pelerasion, jume Ejtaom into jume Munisipiom, inliijenata
nanancha a bittuna betchi’ibo, wa jak yee wam joowa’ lu’utine betchi’ibo,
into waka inliijenata lutu’uria kaa lu’utine betchi’ibo ket ji’osiata a
teuwamta ju’unaktene into juka ya’urata a yo’oriteboka a bo’ojooriane.
Ini si’ime inliijenata au a tu’u yo’oturia betchi’ibo a ju’unaktebaawapo
naateka bempo’immeu lutu’uria jariusakana, amemak tomtatune, into
bempo’immak tekipanoatune.
Waka inliijenatau be’emta into kaa yeu yuma’alata, a yuma betchi’ibo
si’ime ya’uratau utte’a:
I. Inliijenata alleaka kaita au be’eka im naa aa kuaktine betchi’ibo,
inliijenata tekil yo’oturiane into jikau yu’une bem joomepo naatekai,
junaka utte’aka che’a tu’isi jiapsine, si’ime nawi wame baji ya’ura utte’am
into ju inliijenamak nau a tekipanoane. Munisipio ya’ura ket waka tomita
nannancha ameu na’ikiane waka inliijenata witti bem a suane into a
tekipanoane betchi’ibo.
II. Tu’u ya’atune wa emo majtawame che’a jita ta’ana betchi’ibo, woi nokpo
yee majtanapo luula into kaa nanaumachi yoolutu’uriam ta’ana betchi’ibo,
into aa ji’osia nokna, jum primaariapo, elukasion melio superiorpo into
superiorpo. Si’ime inliijenata au majtamta betchi’ibo beekam ayune.
Ju’unakteitune into tekipanoatune wa yee majtawame a joomepo konila
ayukamta into inliijena yoolutu’uriata jippuekai, wa lutu’uria inie
betchi’ibo ju’unakteimtamak lutu’uriane into bempo inliijenammake.
Wate yoemiam ane’ ju’uneiyatebone into am yo’oritebone.
III. Kaabe seariatune emo jijittowapo, junuen beja che’a bu’ sentrom
jootene si’imemmeu yuma betchi’ibo, inliijena jittoata tekipanoane,
inliijenata ji’ibwa aniane kaa wakiko’okoata ili usimet wettne betchibo.
IV. Inliijenata nau jojo’apo, a’anepo into yaaja’apo tu’ute aniane, kaa
obiachisi pupplikotau into pribaotau bichaa yumaka tomim ujbwanne
karim tu’ute into ya’atebone betchi’ibo, jiba junaen si’ime inliijenam
aniasakatune waka alleaka am jiapsi yuma’a betchi’ibo.
V. Jamut inliijenam aniaka naatene waka bem alleaka tu’u jiapsiwamta
am jajamtuane a jichupabao, kaa ko’okoata au yuyumatuane, a aniasimne
che’a emo a majta’i’ateko into wam bweere etejoimpo jita yeu yumawaka
joowapo a nonokne betchi’ibo.
VI. Waka inliijenata kaa aapola au uju’une betchi’ibo, wame boo’om,
wi’itajita into nokita weiyame ameu yeu yuma’ariatune. Ket junuen
teuwatune wam lutu’uriapo inie betchi’ibo katekapo, jaisa ju inliijena juka
nokta na’ikimtemta aa jipu’une.
VII. Jichupawamta into waka aniata kaa ko’okosi joowaka emo ae aniawamta
inliijenata aniaka a yuma’ane, waka tua tu’isi ameu yuma’anemta am
jajameu tajtia. Juka tomi pupplikota into pribaota jume inliiijenam aa
na’ikia jume tekilim joo betchi’ibo, into jiba junaleni nannancha yee bitne
waka jichupawakamta nenki into waet a nokria betchi’ibo.
VIII. Ju’unaktene waka inliijena lutu’uriata kaa inim joometa jinne’
betch’iibo, kaa inim bwiarapo jiba, jakun omot juni’i, waka lutu’uriata
wasampo a tekilwa jinne’ betchi’ibo; jaamuchim che’a kaa ko’okoine
betchi’ibo; wame inliijenam kaa inim joomem usim aniane, kaa am
wakiko’okoine into am majtana betchi’ibo into jume ju’ubwa yo’otume;
bem yomiamtuka’apo luula bem lutu’uria yo’oritebone into bem
yoolutu’uria ju’uneiyatebone.
IX. Inliijenameu lutu’uria jariutune juka Lesaroyo Nasional Plaanta
ya’abaeteko, jiba junuen ayune jume Ejtaom into jume Munisipiom, into
jume inliijenam nau lutu’uriaka teuwaka’u ama kima’ana. Tua junuen
jiba ini lutu’uria inim jinne’uwame utte’ane. Ju Liputaom Kamara jum
Union Konkresopo, jume Ejtaom lejijlaturam be’ekatana into jume
ayuntamientom, bem ameu lutu’uriatuka’apo luula, ket inliijena weyemta
ameu na’ikiana wam ekreso presupuejtom su’utojiwa’apo. Into jiba ket teuwawame into yecha’atune jaisa ini inliijenatau bichaa na’ikianame,
su’utojina into jachinia, junaen beja bempo a tekipanoane into a suuane.
Kaa inliijenata lutu’uria inim ju’unakte’ita nasontaka waka inliijenata
benasi au uju’ume ket inime lutu’uriam jipu’une ti ket a teuwa.

DESCARGA LA CONSTITUCIÓN EN YAQUI.

EJTAO UNILO MEJIKANOM KOJTITUSION POLIITIKA

EJTAO UNILO MEJIKANOM KOJTITUSION POLIITIKA
ENLACE EN: http://site.inali.gob.mx/pdf/Yaqui.pdf
CONSTITUCIÓN MEXICANA EN Yaqui.pdf
Documento Adobe Acrobat 1.6 MB

ENLACE DIRECTO EN: http://site.inali.gob.mx/pdf/Yaqui.pdf